Oʻzbekiston yoshlari robototexnika boʻyicha jahon chempioni boʻldi
Janubiy Koreyaning Incheon shahrida 200 ga yaqin davlat vakillari ishtirokida oʻtayotgan FIRST Global Challenge 2026 xalqaro robototexnika musobaqasida Oʻzbekiston terma jamoasi 3 ta oltin medalni qoʻlga kiritib, mutlaq chempionlikka erishdi.
Yoshlar ishlar agentligi maʼlumotiga koʻra, muhandislar 16 ta oʻyinning barchasida gʻalaba qozonib, 637 ball bilan musobaqa rekordini oʻrnatgan.
Maʼlumot uchun, ushbu musobaqa har yili FIRST Global tashkiloti tomonidan oʻtkaziladigan robototexnika olimpiadasi hisoblanadi. Unda turli mamlakatlardan kelgan oʻsmirlar (14-18 yoshli) muayyan global muammoning muhandislik yechimi ustida bosh qotiradi.
Masalan, bu yilgi musobaqa oʻrmon yongʻinlarining oldini olish, ularning oqibatlarini yumshatish hamda tabiatni qayta tiklash muammosiga bagʻishlandi.
