O‘zbekiston va Hindiston tovar ayirboshlash hajmini 5 mlrd dollarga yetkazish bo‘yicha kelishib oldi
Uchrashuvda ikki mamlakat o‘rtasidagi strategik sheriklikni rivojlantirish hamda investitsiyaviy hamkorlikni kengaytirish masalalari ko‘rib chiqilgan. Ta’kidlanishicha, o‘tgan yili o‘zaro savdo hajmi ilk bor 1 milliard dollarlik marrani zabt etgan. So‘nggi yillarda respublikada Hindiston sarmoyasi ishtirokidagi qo‘shma korxonalar soni 7 barobarga ko‘paydi va hozirda haftasiga 14 ta to‘g‘ridan-to‘g‘ri aviaqatnov yo‘lga qo‘yilgan.
Muzokaralar davomida sanoat kooperatsiyasi, energetika, elektrotexnika, metallurgiya, kritik minerallar, farmatsevtika va zargarlik sohalarida yangi loyihalarni amalga oshirishga kelishilgan. Siyosiy va diplomatik hamkorlikni chuqurlashtirish maqsadida tashqi ishlar vazirlari darajasida alohida muvofiqlashtiruvchi mexanizm yo‘lga qo‘yiladi, parlament va biznes kengashlari faoliyati jadallashtiriladi.
Madaniy-gumanitar sohalarda esa besh yillik hamkorlik dasturi imzolanishi rejalashtirilgan. Tomonlar, shuningdek, BMT, SHHT va BRICS kabi nufuzli xalqaro platformalar doirasida bir-birlarini qo‘llab-quvvatlashda davom etishlarini bildirishgan. Barcha kelishuvlar ijrosini ta’minlash uchun aniq muddat va mas’ullar belgilangan “yo‘l xaritalari” tasdiqlanadi.
