“O‘zbekfilm”ning 1 milliardlik soliq qarzi yopildi
Madaniyat vazirining birinchi o‘rinbosari va Kinematografiya agentligi direktori Jahongir Ahmedov ma’lum qiladiki. soliq masalasi hal etilgach, navbatdagi asosiy vazifa xodimlar oldidagi 3 milliard so‘mdan ziyod to‘planib qolgan ish haqi qarzdorligini uzishga qaratiladi.
Shunga qaramay, kinostudiyaning eng katta moliyaviy muammosi 22,9 million yevrolik kredit majburiyati bo‘lib qolmoqda. Ushbu qarz sabab “O‘zbekfilm”ga tegishli 10 gektarlik yer maydoni hamda boshqa mol-mulklar bank garovida turibdi. Hozirda agentlik Iqtisodiyot va moliya vazirligi bilan birgalikda mazkur majburiyatni tartibga solish hamda yer maydonini garovdan chiqarish choralarini ko‘rmoqda.
Tahlillarga ko‘ra, kinostudiya o‘zini to‘liq mustaqil ta’minlashi uchun yiliga kamida 60 milliard so‘mlik buyurtmalarni bajarishi lozim. Biroq hozircha muassasa to‘liq bozor mexanizmlariga o‘tmagan va davlat buyurtmalariga qaram bo‘lib turibdi. Jahongir Ahmedov “O‘zbekfilm” inqiroz ramzi emas, balki xususiy investitsiyalarni jalb qila oladigan zamonaviy milliy kinokompaniyaga aylanishi kerakligini bildirdi.
Avvalroq Ahmedov “O‘zbekfilm” auksion va bankrotlik yoqasida ekanini aytib, studiyaning yer-mulklari 23 mln yevro kredit uchun garovga qo‘yilganini ma’lum qilgan edi.
