“Open budjet” atrofidagi firibgarliklar yuzasidan rasmiy ogohlantirish berildi
So‘nggi vaqtlarda ijtimoiy tarmoqlarda uchinchi shaxslar tomonidan loyihalarga ovoz to‘plash evaziga moddiy mukofotlar va’da qilish holatlari keskin ko‘paygan. Biroq belgilangan ovoz berilgach, va’da qilingan mablag‘lar to‘lanmayotgani yuzasidan Iqtisodiyot va moliya vazirligiga fuqarolardan yuzlab e’tirozli murojaatlar kelib tushmoqda.
Vazirlik ta’kidlaydiki, “Tashabbusli budjet” loyihalariga ovoz berish jarayoni mutlaqo bepul bo‘lib, amaldagi tartibga ko‘ra ovoz bergan fuqarolarga hech qanday rasmiy moddiy rag‘batlantirish ko‘zda tutilmagan. Ovoz berish faqatgina rasmiy “Ochiq budjet” portali, uning mobil ilovalari hamda rasmiy Telegram boti orqali amalga oshirilishi shart.
Mutasaddilar fuqarolarni shaxsiy ma’lumotlarni begona botlarga kiritmaslikka hamda turli va’dalarga uchib firibgarlar tuzog‘iga tushib qolmaslikka chaqirmoqda. Ma’lumot uchun, joriy mavsumdagi ovoz berish bosqichi 31-avgust kuni soat 23:59 ga qadar davom etadi.
