Olti oyda 1,8 trillion so‘mlik korrupsion qonunbuzarlik fosh etildi
Agentlikning ichki nazorat bo‘linmalari yarim yil ichida 19 709 ta tekshiruv va monitoring o‘tkazgan. Natijada 264,7 milliard so‘mlik qonunbuzarliklar bartaraf etilib, 587,8 milliard so‘m mablag‘ning maqsadsiz sarflanishiga yo‘l qo‘yilmadi.
Davlat xaridlari sohasida umumiy qiymati 350 milliard so‘mlik 92 ta xaridda qonun buzilgani qayd etildi. Shundan 43 ta holat bo‘yicha materiallar huquqni muhofaza qiluvchi organlarga yuborildi. Manfaatlar to‘qnashuviga yo‘l qo‘ygan 137 nafar mansabdor shaxsga nisbatan ma’muriy bayonnomalar rasmiylashtirilib, sudga kiritildi.
Tahlillar davomida 185 ta normativ-huquqiy hujjat loyihasida 255 ta korrupsiyaviy omil topildi. “E-qaror” tizimidagi 24 mingdan ortiq hujjat tekshirilganda, 648 ta holatda hujjatlar asossiz ravishda yopib qo‘yilgani aniqlandi va hokimliklarga ularni ochiqlash bo‘yicha tavsiyalar berildi.
Bundan tashqari, sohaga “Raqamli komplayens” tizimi joriy etilib, Korrupsiyaning oldini olish klasteri hamda virtual akademiya orqali 28 mingdan ziyod davlat xizmatchisi o‘qitildi.
