Olmaotadan Urganchga to‘g‘ridan to‘g‘ri reyslar yo‘lga qo‘yildi
Past budjetli FlyArystan aviakompaniyasi tomonidan amalga oshirilayotgan yangi qatnovlar haftasiga ikki marotaba – payshanba va yakshanba kunlari bajariladi. Olmaotadan Urganchgacha bo‘lgan parvoz davomiyligi 2 soat 35 daqiqani tashkil etmoqda.
E’tiborlisi, ushbu yo‘nalishdagi dastlabki reys bilan Xorazmga Qozog‘istonning 10 ta yirik turistik kompaniyasi vakillari yetib keldi. Ular uchun viloyat bo‘ylab uch kunlik infotur tashkil etilib, dastur doirasida mahalliy va qozog‘istonlik turoperatorlar o‘rtasida to‘g‘ridan to‘g‘ri B2B uchrashuvlari o‘tkazilishi rejalashtirilgan.
Mehmonlar tashrif davomida Xorazmning boy tarixiy-madaniy merosi hamda hududning turistik salohiyati bilan yaqindan tanishadi.
Mutaxassislarning ta’kidlashicha, mazkur aviaqatnov ikki qo‘shni mamlakat o‘rtasidagi transport aloqalarini yanada mustahkamlab, hududiy turizm biznesini yangi bosqichga olib chiqadi.
