Norvegiya qiroli Harald V 89 yoshida vafot etdi
Norvegiya qiroli Harald V 89 yoshida vafot etdi. Qirollik saroyi ma’lumotiga ko‘ra, u 28-avgust kuni Oslo shahridagi milliy shifoxonada hayotdan ko‘z yumgan. Qirol so‘nggi kunlarda kam uchraydigan gemolitik anemiya — qizil qon tanachalari kamayishiga olib keluvchi qon kasalligi sabab davolanayotgan edi.
Harald V Norvegiya taxtida 35 yil o‘tirdi. U mamlakatda 14-asrdan beri Norvegiyada tug‘ilgan ilk qirol bo‘lgan va monarxiyani zamonaviylashtirish, xalq bilan yaqin munosabat o‘rnatish hamda qirollik oilasida an’analarni yumshatishi bilan tanilgan.
U 1968-yilda oddiy oiladan chiqqan Sonya Haraldsenga uylangan. Bu qaror o‘sha davr qirollik an’analariga zid bo‘lib, keyinchalik qirol farzandlarining ham oddiy fuqarolarga turmush qurishiga yo‘l ochgan.
Harald V 2011-yilda Anders Breivik tomonidan amalga oshirilgan teraktlardan keyin norveg xalqiga qilgan ta’sirchan murojaati bilan ham yodda qolgan. U norvegiyaliklarni qo‘rquvga berilmaslik va bir-birini qo‘llab-quvvatlashga chaqirgan.
So‘nggi yillarda qirollik oilasi bir qator mojarolar va sog‘liq muammolariga duch keldi. Shunga qaramay, Harald V mamlakatda juda mashhur bo‘lib qoldi va ko‘pincha “xalq qiroli” sifatida ta’riflangan.
Qirolning o‘rnini uning 53 yoshli o‘g‘li Haakon egallaydi. U juma kuni hukumat bilan navbatdan tashqari Davlat kengashini o‘tkazadi.
Harald V ortida qariyb 58 yillik turmush o‘rtog‘i qirolicha Sonya, qizi malika Märtha Louise, o‘g‘li yangi qirol Haakon va olti nabirasini qoldirdi.
