New Port turar-joy majmuasining 6 bloki ro‘yxatdan o‘tmasdan qurilgani ma’lum bo‘ldi
Toshkent shahrining Yakkasaroy tumanidagi MEGA LOGISTICS SERVICE MChJ tomonidan olib borilayotgan New Port turar-joy majmuasining 9 ta blokidan 6 tasida qurilish ishlari belgilangan tartibda ro‘yxatdan o‘tkazilmagani aniqlandi. Bu haqda Qurilish va uy-joy kommunal xo‘jaligi sohasida nazorat qilish inspeksiyasi ma’lum qildi.
Inspeksiya ma’lumotiga ko‘ra, jami 9 ta blokda qurilish-montaj ishlari olib borilmoqda. Shundan 3 ta blok bo‘yicha Arxitektura va shaharsozlik kengashi ishchi organining ijobiy xulosasi hamda tegishli ekspertiza xulosalari mavjud bo‘lib, ular asosida ushbu bloklar Toshkent shahar hududiy nazorat inspeksiyasida belgilangan tartibda ro‘yxatdan o‘tkazilgan.
Nazorat tadbirlari davomida qolgan 6 ta blokda esa qurilish-montaj ishlari inspeksiyada ro‘yxatdan o‘tkazilmasdan amalga oshirilayotgani aniqlangan.
Shu munosabat bilan buyurtmachi — MEGA LOGISTICS SERVICE MChJga bir necha bor majburiy ijro etilishi lozim bo‘lgan yozma ko‘rsatmalar berilgan. Ularda qurilish ishlarini amaldagi shaharsozlik hujjatlariga muvofiq hamda obyektni inspeksiyada belgilangan tartibda ro‘yxatdan o‘tkazgan holda olib borish talabi qo‘yilgan.
Biroq ko‘rsatmalarda belgilangan talablar bajarilmagani sababli buyurtmachining mas’ul mansabdor shaxslari ma’muriy javobgarlikka tortilgan. Shuningdek, buyurtmachining texnik nazoratchisiga nisbatan tegishli taqdimnoma kiritilib, ta’sir choralari qo‘llangan.
Inspeksiya, shuningdek, mazkur holatlar yuzasidan to‘plangan hujjatlar huquqiy baho berish uchun huquqni muhofaza qiluvchi organlarga yuborilganini ma’lum qildi.
Qayd etilishicha, obyektda aniqlangan qonunbuzilishlar vakolat doirasida nazorat tadbirlari o‘tkazilib, tegishli ta’sir choralari qo‘llangan hamda qonunbuzilishlarga huquqiy baho berilishi uchun choralar ko‘rilgan.
