Navoiyda ikki nafar voyaga yetmagan bola kanalda cho‘kib ketdi
Bosh prokuratura matbuot kotibi Hayot Shamsuddinovning Portal24 ga ma’lum qilishicha, voqea Navbahor tumanidagi “Yangiobod” mahallasidan oqib o‘tuvchi “Beshrabot-Konimex” kanalida sodir bo‘lgan. 2011-yilda tug‘ilgan, tumanidagi 2-sonli umumta’lim maktabining o‘quvchilari (sinfdoshlar) R.B. va A.S. tengdoshlari bilan birga kanalga cho‘milish uchun borib, suvda cho‘kib ketishgan.
Sud-tibbiy ekspertizasining dastlabki xulosasiga ko‘ra, bolalarning o‘limiga nafas yo‘llariga suv kirishi oqibatida yuzaga kelgan mexanik asfiksiya (bo‘g‘ilish) sabab bo‘lgan. Voqea joyini o‘rganish davomida tan jarohatlari yoki boshqa jinoyat alomatlari aniqlanmagan. Shuningdek, xavfsizlik chorasi sifatida kanal yaqinidagi sug‘orish nasosi ham tekshirilgan va suvda elektr toki yo‘qligi tasdiqlangan.
Ikkala marhum o‘quvchi ham tumandagi “Yangiobod” mahallasida istiqomat qilgan. Hozirda mazkur holat yuzasidan Navbahor tumani prokuraturasi tomonidan tergovga qadar tekshiruv ishlari davom ettirilmoqda. Tekshiruv yakunlariga ko‘ra qonuniy qaror qabul qilinadi.
