Misrdagi O‘zbekiston fuqarolariga shoshilinch ogohlantirish berildi
Diplomatik vakolatxonaning ma'lum qilishicha, so‘nggi vaqtlarda O‘zbekistonning Misrdagi elchixonasiga fuqarolarning mahalliy huquq-tartibot organlari tomonidan ushlab turilishi bilan bog‘liq murojaatlar soni ortgan. Misr rasmiylariga ko‘ra, ayni paytda Qohirada xorijliklarning
migratsiya qonunlari va jamoat tartibiga rioya qilishi ustidan nazorat kuchaytirilgan.
Mamlakatda noqonuniy bo‘lib turgan va tartibni buzgan chet elliklarga nisbatan ma’muriy choralar, jumladan, deportatsiya qo‘llanilmoqda. Shu sababli Misrdagi o‘zbekistonliklardan mahalliy qonunlarga amal qilish, pasportni doimo o‘zi bilan olib yurish, amaldagi viza, vaqtincha yashash ruxsatnomasi (iqoma) yoki o‘qish hujjatiga ega bo‘lish hamda ularning muddatini o‘z vaqtida uzaytirish talab etiladi.
Agar huquq-tartibot idoralari tomonidan ushlab turish holati yuz bersa, shaxsiy hujjatlarni begonalarga bermaslik hamda zudlik bilan elchixonaning +20233361723 yoki +20233364516 telefon raqamlariga xabar berish tavsiya etilgan.
