Mirziyoyev Koreya Milliy Assambleyasi spikeri bilan uchrashdi
Shavkat Mirziyoyev Koreya Respublikasiga davlat tashrifi doirasida 15-sentyabr kuni mamlakat Milliy Assambleyasi spikeri Cho Chjon Shik bilan uchrashdi. BU haqda prezident matbuot xizmati xabar berdi.
Uchrashuvda O‘zbekiston va Koreya o‘rtasidagi alohida strategik sheriklik munosabatlarini rivojlantirishda ikki mamlakat parlamentlarining muhim o‘rni qayd etildi.
Tomonlar parlamentlararo “do‘stlik guruhlari” faol ishlayotgani, delegatsiyalarning muntazam tashriflari yo‘lga qo‘yilgani hamda qonun chiqaruvchi organlarning tegishli qo‘mitalari o‘rtasida tajriba almashinuvi olib borilayotganini ta’kidladi.
Shuningdek, Koreya Milliy Assambleyasi va Koreya xalqaro hamkorlik agentligi ko‘magida Oliy Majlisning har ikki palatasida “Elektron parlament” loyihasi amalga oshirilayotgani qayd etildi.
Muzokaralarda oliy darajada erishilgan kelishuvlar, xususan, savdo-iqtisodiy, investitsiyaviy va madaniy-gumanitar aloqalarni kengaytirishga qaratilgan loyihalar ijrosi ustidan parlament monitoringini ta’minlaydigan hamkorlik mexanizmini yaratish zarurligi bildirildi.
Uchrashuv yakunida 2027-yilda O‘zbekiston va Koreya o‘rtasida diplomatik munosabatlar o‘rnatilganining 35 yilligi munosabati bilan “parlament diplomatiyasi” yo‘nalishida qator tadbirlar o‘tkazishga kelishib olindi.
