Microsoft 4,8 ming xodimini ishdan bo‘shatadi: sabab sun’iy intellektmi?
Microsoft kompaniyasi sun’iy intellekt yo‘nalishiga ajratilayotgan yirik investitsiyalar fonida qariyb 4 800 nafar xodimini qisqartirishini ma’lum qildi. Bu korxona umumiy ishchi kuchining taxminan 2,1 foizini tashkil etadi.
Qayd etildiki, texnologiya kompaniyalari bir tomondan sun’iy intellekt infratuzilmasiga milliardlab dollar yo‘naltirayotgan bo‘lsa, ikkinchi tomondan aynan ushbu texnologiyalar yordamida biznes jarayonlarini avtomatlashtirib, xodimlar sonini qisqartirmoqda.
2026-yilda dunyoning yirik texnologik kompaniyalari sun’iy intellektni rivojlantirish uchun jami 700 milliard dollardan ortiq mablag‘ sarflashi kutilmoqda. Bunday ulkan xarajatlar kompaniyalarni mablag‘larni qoplash va operatsion xarajatlarni kamaytirish choralarini ko‘rishga undamoqda. Joriy yilda Amazon va Meta ham minglab xodimlarini ishdan bo‘shatgan.
Microsoft xodimlar qisqartirilishini kompaniya aksiyalari 2026-yilning birinchi yarmida qariyb 23 foizga arzonlashganidan so‘ng e’lon qildi. Bu 2022-yildan buyon kuzatilgan eng yomon natija hisoblanadi. Bundan avval kompaniya AQSHdagi xodimlarining qariyb 7 foiziga, ya’ni 9 ming nafarga yaqin ishchiga ixtiyoriy ravishda ishdan bo‘shash evaziga kompensatsiya taklif qilgandi. Microsoft odatda moliyaviy yil yakunida, ya’ni iyun oyidan so‘ng shtatni optimallashtirish amaliyotini o‘tkazadi.
