Metro rahbari 652 mln so‘m oylik olganmi? - mutasaddi izoh berdi
Toshkent metropoliteni tomonidan o’tkazilgan matbuot anjumanida jurnalistlar korrupsiya masalalari hamda metropoliten rahbariyati 700 million so‘mgacha maosh olishi haqidagi ma’lumotlar yuzasidan izoh so‘radi.
Toşkent metropoliteni aksiyadorlik jamiyati boşqaruv raisi örinbosari Solihov Uluğbek Farruxoviç rahbarga ajratilgan 652 million so‘m uning oylik maoshi emasligini bildirdi. Uning aytishicha, ushbu mablag‘ rahbarning sog‘lig‘ini tiklashi uchun ssuda, ya’ni qaytarish sharti bilan berilgan pul hisoblanadi. Mablag‘ni bir yil ichida qaytarish belgilangan.
Biroq keltirilgan javobda pulni olgan rahbarning ismi va aniq lavozimi ochiqlanmadi. Mablag‘ qachon ajratilgani va hozirga qadar qaytarilgan-qaytarilmagani haqida ham ma’lumot berilmadi.
Mutasaddi rahbariyatga to‘lanadigan mablag‘lar haqidagi savolga javob berar ekan, ish haqi masalasida bir qancha tekshiruvlar o‘tkazilganini ham ma’lum qildi. Uning aytishicha, e’tirozlarga sabab bo‘lgan hisobotlarda xizmat safari hamda rag‘batlantirish bilan bog‘liq xarajatlar oylik ish haqi sifatida qayd etilgan.
“Bu yerda xizmat safari va rag‘batlantirish bilan bog‘liq xarajatlar oylik ish haqi deb qayd etib ketilgan. Lekin bular oylik ish haqi emasligi ko‘rsatib o‘tildi”, — dedi mutasaddi.
U tekshiruvlar davomida ushbu holatlarga tushuntirish berilganini aytib, ijtimoiy tarmoqlarda tarqalgan ma’lumotlarni rad etdi. Shuningdek, rahbarning amaldagi oylik maoshi qancha ekani esa keltirilgan javobda aytilmadi.
Anjumanda qarindoshlarning metropolitenda ishlashi masalasiga ham munosabat bildirildi. Mutasaddi bu borada kelib tushgan murojaatlar o‘rganilgani va tegishli hisobotlar berilganini ma’lum qildi. Uning ta’kidlashicha, tashkilotda nepotizm holati aniqlanmagan.
Shu bilan birga, u metropolitenda uch avlod vakillari faoliyat yuritayotgan holatlar mavjudligini aytdi. Mutasaddining izohlashicha, ushbu xodimlar bir-biriga aloqasiz, manfaatlar to‘qnashuvi bo‘lmagan yo‘nalishlarda ishlaydi.
“Bizda nepotizm bo‘yicha hech qanday holat aniqlanmagan. To‘g‘ri, qarindosh-urug‘chilik bor, ya’ni uch avlod vakillari metropolitenda ishlash holatlari hozir ham mavjud. Lekin ular bir-biriga aloqasiz, ya’ni manfaatlar to‘qnashuvi bo‘lmagan yo‘nalishlarda faoliyat olib borishadi”, — dedi u.
Mutasaddi murojaatlar o‘rganilganini bildirgan bo‘lsa-da, keltirilgan javobda tekshiruvlarni qaysi tashkilot o‘tkazgani, ular qaysi davrni qamrab olgani va xulosalar qachon chiqarilganiga aniqlik kiritilmadi.
