Markirovka bo‘lmagani uchun 28 tonna O‘zbekiston piyoz va sabzisi Qirg‘izistondan ortga qaytarildi
Qirg‘iziston Suv resurslari, qishloq xo‘jaligi va qayta ishlash sanoati vazirligi ma’lumotlariga ko‘ra, qoidabuzarlik “Qizil-Qiya avtojolu” nazorat-o‘tkazish postida o‘tkazilgan fitosanitariya tekshiruvi davomida aniqlangan.
Qo‘shni davlat mutasaddilarining ta’kidlashicha, karantin ostidagi qishloq xo‘jaligi mahsulotlarini tegishli markirovkasiz olib kirish Yevroosiyo iqtisodiy ittifoqining yagona fitosanitariya talablariga zid hisoblanadi. Shu sababli nazorat xodimlari yukni chegaradan o‘tkazishni rad etgan.
Qirg‘izistonning mas’ul idoralari davlat chegarasida fitosanitariya xavfsizligini ta’minlash va karantin qoidalariga rioya etilishini nazorat qilish tadbirlari qat’iy davom ettirilishini bildirdi.
