Markaziy Osiyo davlatlarining yalpi ichki mahsuloti besh yil ichida deyarli ikki barobarga ko‘payib, 543 milliard dollarga yetdi
Mintaqadagi eng yirik iqtisodiyot sifatidagi o‘rnini saqlab qolgan Qozog‘iston YAIMi 171 milliarddan 306 milliard dollarga yetgan bo‘lsa-da, uning umumiy mintaqaviy ulushi 60 foizdan 56,4 foizga biroz qisqardi. O‘zbekiston esa o‘z ko‘rsatkichini 70 milliarddan 147 milliard dollarga yetkazib, Markaziy Osiyo iqtisodiyotidagi ulushini 24,6 foizdan 27,1 foizga oshirishga erishdi. Shuningdek, Turkmaniston YAIMi 50 milliard, Qirg‘iziston 23 milliard va Tojikiston 18 milliard dollarni tashkil etdi.
Iqtisodiy o‘sish sur’atining tezligi bo‘yicha esa Qirg‘iziston o‘rtacha yillik 9,2 foizlik ko‘rsatkich bilan mintaqada yetakchilik qildi. Ushbu davrda Tojikiston 8,5 foiz, O‘zbekiston 7 foiz, Turkmaniston 6,3 foiz va Qozog‘iston 4,8 foizlik o‘sish sur’atlarini qayd etgan.
Mintaqa iqtisodiyotida kuzatilgan asosiy tarkibiy o‘zgarish – xizmatlar sohasi ulushining oshishi hamda agrar sektor salmog‘ining kamayishi bo‘ldi. Xususan, O‘zbekistonda xizmatlar ulushi 38,7 foizdan 46,5 foizga ko‘tarilib, qishloq xo‘jaligi ulushi 21,6 foizdan 16,6 foizgacha pasaydi. Umumiy olganda, Markaziy Osiyo YAIMida xizmatlar sohasi 53 foizgacha yetib, asosiy drayverga aylandi.
