Markaziy bank Soliq qo‘mitasining P2P nazorati taklifini Konstitutsiyaga zid deb baholadi
"Kursiv" nashri xabariga ko‘ra, Markaziy bank raisi o‘rinbosari Abrorxo‘ja Turdaliyev Soliq qo‘mitasi ilgari surgan tashabbus Konstitutsiyaning 41-moddasiga zid ekanini ma’lum qilgan. Mazkur moddada bank operatsiyalari, omonatlar va hisobvaraqlar siri qonun bilan himoya qilinishi belgilangan.
Regulyatorning fikricha, yirik miqdordagi P2P o‘tkazmalari bo‘yicha ma’lumotlarni avtomatik tarzda soliq organlariga yuborish fuqarolarning konstitutsiyaviy huquqlariga salbiy ta’sir ko‘rsatishi, naqd pul aylanmasini oshirishi hamda mablag‘larning bank tizimidan norasmiy muomalaga chiqib ketishiga sabab bo‘lishi mumkin.
P2P (Peer-to-Peer) — bu jismoniy shaxslar o‘rtasidagi kartadan kartaga pul o‘tkazmalari hisoblanadi. Masalan, qarindosh, do‘st yoki tanishga mobil ilova orqali pul yuborish P2P o‘tkazmasiga kiradi.
Eslatib o‘tamiz, Soliq qo‘mitasi jamoatchilik muhokamasiga qo‘ygan loyiha bo‘yicha banklar oyiga 500 BHMdan ortiq P2P o‘tkazmalari (yaqin qarindoshlar bundan mustasno) haqida ma’lumot taqdim etishi taklif qilingan edi.
Shundan so‘ng mazkur tashabbus jamoatchilikda keng muhokamalarga sabab bo‘ldi. Soliq qo‘mitasi esa ushbu tartib oddiy fuqarolarning o‘zaro pul o‘tkazmalarini nazorat qilish emas, balki tadbirkorlik faoliyatida P2P to‘lovlaridan noqonuniy foydalanish holatlarini aniqlashga qaratilganini bildirgan.
Hozircha mazkur hujjat loyiha bosqichida bo‘lib, yakuniy qaror qabul qilinmagan.
