Markaziy bank Mustaqillikning 35 yilligiga bag‘ishlangan oltin va kumush tangalarni sotuvga chiqardi
Cheklangan nusxada zarb etilgan kolleksiyaning dastlabki tiraji oltin tangalar uchun 450 dona, kumush tangalar uchun esa 800 donani tashkil etadi. Oltin tangalar 999,9 probali sof metalldan tayyorlangan bo‘lib, har birining vazni 31,1 grammga teng.
Ushbu kolleksiya uch xil dizayndagi oltin tangalardan iborat. Birinchi tangada Mustaqillik monumenti va Davlat bayrog‘i, ikkinchisida Islom sivilizatsiyasi markazi va Davlat gerbi, uchinchisida esa "35" raqami hamda madhiyamizdagi "Olamni mahliyo aylagan diyor!" satri aks ettirilgan. Fuqarolar tangalarni to‘plam shaklida yoki alohida xarid qilishlari mumkin.
Markaziy bank tomonidan 28-avgust holatiga bitta oltin tanganing sotuv narxi 57 million 39 ming so‘m etib belgilandi. Shu bilan birga, regulyator tangalarni qayta sotib olish narxini xarid qiymatidan 6,67 foizga arzonroq, ya’ni 53 million 237 ming so‘m miqdorida belgilagan.
