Mansabdorlar ustidan shikoyatlar 36 foizga kamaydi. Xalq qabulxonasiga eng ko‘p nima bo‘yicha murojaat qilinmoqda?
Xalq qabulxonasi rahbari Farrux Omonov bergan ma’lumotlarga ko‘ra, joriy yilda amaldorlar ustidan tushgan shikoyatlar soni qariyb 29 mingtasini tashkil etib, o‘tgan yilgiga nisbatan 36 foizga kamaydi. Shunga qaramay, mahalliy hokimiyat, MIB, soliq, IIB, tibbiyot va bank xodimlari faoliyatidan norozilik holatlari hali ham yetarlicha uchrab turibdi. Yilning dastlabki yetti oyida murojaatlar asosida 3 mingdan ortiq davlat xizmatchisiga nisbatan intizomiy va boshqa ko‘rinishdagi choralar ko‘rilgan.
Aholi tomonidan eng ko‘p murojaat huquq-tartibot sohasiga to‘g‘ri kelgan – 126,6 mingdan ziyod. Bu yo‘nalishdagi shikoyatlarning qariyb 37 mingtasi aliment undirish masalasiga taalluqlidir. Ijtimoiy himoya va uy-joy yo‘nalishida esa 113,8 mingta murojaat qayd etilgan bo‘lib, ayniqsa, 18 yoshgacha bo‘lgan bolalar uchun nafaqa so‘rab qilingan murojaatlar o‘tgan yilgiga qaraganda 38 foizga oshgan. Kommunal xizmatlar (gaz, svet, suv, issiqlik) masalasida esa 74,8 mingdan ortiq murojaat tushgan.
Hududlar kesimida eng ko‘p murojaat Toshkent shahri (74,5 mingta), Qashqadaryo (60,5 mingta) va Surxondaryo (55,4 mingta) viloyatlari hissasiga to‘g‘ri keldi. Eng kam ko‘rsatkich esa Sirdaryo viloyatida (20,4 mingta) qayd etildi. Shuningdek, fuqarolarning qabulxonalarga shaxsan kelishi keskin kamayib, murojaatlarning 90 foizdan ortig‘i masofaviy, ya’ni elektron shaklda qabul qilinmoqda.
