Malayziyada o‘zbekistonliklar uchun vizasiz rejimni soddalashtirish choralari ko‘rilmoqda
O‘zbekistonning Malayziyadagi elchixonasi vakillari ushbu mamlakat Migratsiya departamenti bosh direktori o‘rinbosari Aminudin bin Yahaya bilan uchrashuv o‘tkazdi. Muloqot chog‘ida ikki davlat o‘rtasidagi turizm, ta’lim va savdo-iqtisodiy aloqalar jadal rivojlanib borayotgani, bu esa fuqarolarning harakatlanishini yanada yengillashtirishni talab etayotgani ta’kidlangan.
Malayziya tomonining qayd etishicha, so‘nggi yillarda mamlakatda qonuniy yashash va ishlash ruxsatnomalarini olayotgan o‘zbekistonliklar soni muttasil oshib bormoqda. Malayziyaga tashrif buyurayotgan hamyurtlarimizning asosiy qismini talabalar va yuqori malakali mutaxassislar tashkil etadi.
Ma’lumot uchun, hozirda O‘zbekiston fuqarolari Malayziyaga 30 kungacha vizasiz kirish huquqiga ega. Amaldagi qoidalarga ko‘ra, mamlakatga kirishda fuqarolardan 30 kunlik muddat ichida ortga qaytish yoki uchinchi davlatga uchish aviachiptasini taqdim etish talab etiladi.
