Farg‘ona va Afg‘oniston o‘rtasida qariyb 900 mln dollarlik shartnoma imzolandi
Afg‘onistonning Kobul va Mozori Sharif shaharlarida Farg‘ona viloyatining alohida savdo uylari ochildi. Bu haqda Farg‘ona viloyati hokimligi xabar beridi.
Viloyat hokimi Xayrullo Bozorov boshchiligidagi 150 nafar tadbirkordan iborat delegatsiya o‘tgan hafta oxirida xizmat safari bilan Afg‘onistonga borgani haqida xabar bergan edik. Tashrif davommmida Kobul va Mozori Sharif shaharlarida uchrashuvlar hamda biznes muzokaralari o‘tkazilib, umumiy qiymati 875,9 million dollarlik 106 ta savdo shartnomasi va kelishuvlari imzolandi.
Kobul va Mozori Sharifda savdo uyi ochildi
26-iyul kuni Kobul shahrida Farg‘ona viloyati savdo uyining tantanali ochilish marosimi bo‘lib o‘tdi. Unda Farg‘ona viloyati hokimi Xayrullo Bozorov, Afg‘oniston Savdo va investitsiyalar palatasi raisi o‘rinbosari Zilg‘ay Arian Azimiy hamda ikki mamlakat ishbilarmon doiralari vakillari ishtirok etdi.
Savdo uyida Farg‘ona viloyatida ishlab chiqarilgan elektr skuterlar, velosipedlar, elektrotexnika mahsulotlari va qurilish materiallari namoyish etiladigan shourum tashkil etilgan. Shuningdek, Qo‘qondan mahsulotlarni yig‘ish uchun yarim tayyor butlovchi qismlar ham yetkazib beriladi.
27-iyul kuni Kobulda bo‘lib o‘tgan O‘zbekiston–Afg‘oniston biznes-forumi doirasida Farg‘ona viloyatining investitsiyaviy salohiyati, sanoat kooperatsiyasi va qo‘shma loyihalarni amalga oshirish imkoniyatlari taqdim etildi. Forum va ikki tomonlama uchrashuvlar davomida Afg‘oniston bilan savdo-iqtisodiy hamkorlikni kengaytirish, o‘zaro tovar ayirboshlash hajmini oshirish, O‘zbekiston mahsulotlari eksportini ko‘paytirish, shuningdek, qishloq xo‘jaligi, logistika, elektrotexnika, to‘qimachilik, qurilish materiallari va farmatsevtika sohalarida hamkorlikni rivojlantirish masalalari muhokama qilindi. Bundan tashqari, Farg‘ona viloyatida afg‘onistonlik tadbirkorlar ishtirokida alohida biznes-forum o‘tkazish tashabbusi ham ilgari surildi.
Shuningdek, Farg‘ona viloyati delegatsiyasi Mozori Sharif shahrida ham viloyatning savdo uyi ochilish marosimida ishtirok etdi. Marosimdan olingan suratlarga ko‘ra, ushbu savdo uyida ham velosipedlar, maishiy elektrotexnika mahsulotlari, santexnika buyumlari, qurilish materiallari hamda kimyo sanoati mahsulotlari namoyish etilgan.
Savdo uylari ochilishi munosabati bilan Farg‘ona viloyati hokimligi Mozori Sharif shahar shifoxonasiga gumanitar yordam sifatida zamonaviy tibbiy uskunalarni topshirdi.
Afg‘oniston Davlat korporatsiyalarini boshqarish boshqarmasi rahbari Mavlaviy Ahmadjon Bilol bilan bo‘lib o‘tgan uchrashuvda IT sohasidagi hamkorlikni kengaytirish va elektroenergetika tizimiga zamonaviy boshqaruv texnologiyalarini joriy etish masalalari muhokama qilindi.
Shuningdek, Yozyovon tumanidagi Green Infrastructure Investments Group kompaniyasi bilan hamkorlikda Afg‘onistonda “aqlli” elektr hisoblagichlari ishlab chiqarishni yo‘lga qo‘yish masalasi ham alohida ko‘rib chiqilgan.
