Қозоғистонда АЭС қуришга қарши чиққанлар жазоланди
Қозоғистоннинг Олмаотада шаҳрида бўлиб ўтган судда мамлакатда атом электр станцияси (АЭС) қурилишига қарши чиққан беш нафар фаол – Айдар Мубораков, Нурлан Жаулибаев, Фозилжон Сидиқов, Нурлан Темирғалиев ва Жанат Қозоқбойнинг ҳар бирига 4 йилдан озодликни чеклаш жазоси тайинланган.
Тергов уларни куч ишлатиш, ёнғин чиқариш, мол-мулкни йўқ қилиш, қурол ва портловчи моддалар қўллаш орқали ҳокимиятга қарши қуролли қаршилик кўрсатишни режалаштирган, деб таъкидлаган.
Айбланувчилар эса буни инкор этиб, фақат АЭС қурилишига қарши фикр билдирганини, қўзғолон уюштириш ниятида бўлмаганини айтган. Уларнинг адвокатлари ҳам куч ишлатар идоралар даъвосини тасдиқловчи далиллар йўқлигини қайд этган.
