Қоя юрагини ёриб чиққан шаршара ҳақида эшитганмисиз?
Шаршара Тортум кўли чиқишидан ҳосил бўлган бўлиб, тарихий манбаларга кўра XVIII асрда содир бўлган йирик кўчки натижасида вужудга келган. Ушбу кўчки Тортум дарёсининг оқимини тўсиб, катта кўл пайдо қилган ва вақт ўтиши билан сув баланд қоядан пастга қулаб, бугунги шаршара шаклини олган. Тортум шаршарасининг баландлиги тахминан 48 метр, кенглиги эса 21 метр атрофида бўлиб, айниқса баҳор ойларида сув миқдори кўпайганда янада ҳайратланарли манзара ҳосил қилади.
Шаршара атрофи ям-яшил табиат, тик қоялар ва тоза ҳаво билан ажралиб туради. Бу ҳудуд сайёҳлар, табиат ихлосмандлари ва фотосуратчилар учун жуда қулай маскан ҳисобланади. Куз фаслида ранг-баранг барглар, баҳорда эса жўшқин сув оқими Тортум шаршарасига алоҳида гўзаллик бахш этади.
Тортум шаршараси нафақат эстетик жиҳатдан, балки туристик аҳамияти билан ҳам муҳимдир. Бу ерда махсус томоша майдончалари, пиёдалар йўлаклари ва дам олиш ҳудудлари ташкил этилган. Сўнгги йилларда инфратузилманинг ривожланиши натижасида шаршарага ташриф буюрувчилар сони тобора ошиб бормоқда.
Агар сиз Ниагара, Игуасу ёки Виктория каби дунёнинг машҳур шаршараларига боришни истасангиз, аввал Тортум шаршарасини танлаб кўришингиз мумкин. У саёҳат учун анча арзон, географик жиҳатдан яқин ва табиатнинг қудратини ҳис этиш учун етарлича таъсирли маскандир.
Учқун Намозов
Туркиянинг Эрзурум шаҳридан!
