“Kamchiliklar bartaraf etilmaguncha bekatlar foydalanishga topshirilmaydi”. Toshkentda yangi avtobus bekatlari qanday bo‘ladi?
Toshkent shahar hokimligida poytaxtdagi yangi avtobus bekatlari loyihasiga bag‘ishlangan matbuot anjumani bo‘lib o‘tdi. Unda yangi bekatlarning qulayliklari, loyiha qiymati, investor majburiyatlari hamda savdo obyektlarini ko‘chirish masalalari haqida ma’lumot berildi.
Mutaxassislar aytadiki, yangi bekatlar barcha yo‘lovchilar, jumladan, imkoniyati cheklangan fuqarolar uchun ham qulay bo‘ladi. Bekatlarda panduslar, taktil plitkalar, videokuzatuv kameralari, elektron tablolar va favqulodda chaqiruv tugmasi o‘rnatiladi. Kamchiliklar bartaraf etilmaguncha ular foydalanishga topshirilmaydi.
Anjumanda bekatlar narxi yuzasidan ham izoh berildi. Ta’kidlanishicha, e’lon qilinayotgan qiymat faqat bekat konstruksiyasi emas, balki barcha qo‘shimcha jihozlar va infratuzilmani ham o‘z ichiga oladi.
Loyiha shahar byudjeti emas, investor mablag‘lari hisobidan amalga oshirilmoqda. Dastlab 240 ta zamonaviy bekat o‘rnatilishi rejalashtirilgan. Investor, shuningdek, hududlarni ko‘kalamzorlashtirish hamda reklama maydonlarining kamida 20 foizini ijtimoiy ahamiyatga ega materiallarga ajratish majburiyatini olgan.
Matbuot anjumanida bekatlar bilan bog‘liq savdo obyektlarini ko‘chirish masalasi ham muhokama qilindi. Mutasaddilar har bir holat qonuniy asosda ko‘rib chiqilayotganini, ayrim tadbirkorlarga kompensatsiya to‘langanini, kelishuvga erishilmagan obyektlar bo‘yicha esa sud jarayoni davom etayotganini ma’lum qildi.
Anjuman yakunida jurnalistlarning savollariga javob berilib, loyiha bo‘yicha jamoatchilikning asosli takliflari bundan keyin ham inobatga olinishi ta’kidlandi.
