Jizzaxda kelinini 2 oy qamab qo‘yib, qaynoq suv va tuz bilan qiynagan oilaga nisbatan jinoyat ishi qo‘zg‘atildi
Nemolchi.uz loyihasi hamda Jizzax viloyati IIB ma’lumotlariga ko‘ra, 2026-yilning may oyida turmush o‘rtog‘i qamoqqa olingan F.M. ismli ayol qaynonasi va qaynopalari tomonidan tazyiqqa uchragan. Uning pasporti, telefoni va farzandining guvohnomasini tortib olgan qarindoshlari kelinni ijaraga olingan kvartirada majburan ushlab turishgan. Ayol muntazam ravishda kaltaklanib, ruhiy hamda jismoniy qiynoqlarga solingan, shuningdek, suv va oziq-ovqatdan mahrum qilingan.
Tazyiqlar avgust oyining oxirida yanada shafqatsiz tus olgan. Qaynopalardan biri ayolning ustidan qaynoq suv, so‘ngra unga tuz va soda aralashtirib quya boshlagan. Shafqatsiz qiynoqlardan so‘ng o‘ta og‘ir ahvolga tushgan jabrlanuvchi 6-sentyabr kuni kvartiraning uchinchi qavatidagi yong‘in zinapoyasi orqali qochishga erishgan hamda otasining yordami bilan shifoxonaga yotqizilgan.
Respublika shoshilinch tibbiy yordam ilmiy markazining Jizzax filiali bergan ma’lumotga ko‘ra, fuqaroga tanasining 6–8 foiz qismida 2-3 darajali kuydirish jarohatlari tashxisi qo‘yilgan. Holat yuzasidan Jinoyat kodeksining 109-moddasi (Qasddan badanga yengil shikast yetkazish) va 110-moddasi (Qiynash) bo‘yicha jinoyat ishi qo‘zg‘atilib, tezkor-tergov guruhi tomonidan surishtiruv ishlari olib borilmoqda.
Qolaversa mazkur holat Ijtimoiy himoya milliy agentligining Jizzax viloyati boshqarmasi tomonidan nazoratga olingan.
Hozirda fuqaro xavfsizligini ta’minlash va unga zarur ko‘mak ko‘rsatish maqsadida birlamchi ko‘mak xonasiga joylashtirilgan. Fuqaro bilan individual ishlashni tashkil etish maqsadida unga nisbatan keys ochilib, ehtiyojlari o‘rganilmoqda hamda aniqlangan ehtiyojlaridan kelib chiqib, tegishli ijtimoiy xizmatlar biriktirilmoqda.
Shuningdek, fuqaroning ruhiy-emotsional holatini tiklash va psixologik qo‘llab-quvvatlash maqsadida “Inson” ijtimoiy xizmatlar markazi psixologlari tomonidan tegishli yordam ko‘rsatilmoqda.
