Jizzaxda 33 ming kishilik atomchilar shaharchasi quriladi
Jizzax viloyatida integratsiyalashgan atom elektr stansiyasi qurilishi doirasida qariyb 33 ming aholiga mo‘ljallangan zamonaviy atomchilar shaharchasi barpo etilishi rejalashtirilmoqda. Prezident Shavkat Mirziyoyev AES va unga yondosh shaharcha qurilishi bo‘yicha amalga oshirilayotgan ishlar taqdimoti bilan tanishdi.
Shaharcha 200 gektar maydonda bunyod etilib, unda 10 mingga yaqin xonadon qurilishi ko‘zda tutilgan. Birinchi bosqichda esa 3 mingta xonadonli turar joylar barpo etiladi.
Yangi shaharchada energiya samarador ko‘p qavatli uylar, maktab va maktabgacha ta’lim tashkilotlari, tibbiyot, sport va madaniyat obyektlari, dam olish maskanlari hamda keng yashil hududlar tashkil etiladi. Qurilishda zamonaviy issiqlik himoyasi, muqobil energiya manbalari va “aqlli” yoritish yechimlaridan foydalaniladi.
Shaharcha AES qurilishi davrida ishchi va mutaxassislar hamda ularning oilalarini munosib yashash sharoiti bilan ta’minlashga xizmat qiladi.
Taqdimotda AES qurilishining borishi haqida ham ma’lumot berildi. 9,5 milliard dollarlik loyiha 4-iyundan faol qurilish bosqichiga o‘tgan. Hozirgacha reaktor binosi uchun kotlovan qazish ishlari yakunlanib, 1 million kub metrdan ortiq tuproq qazib olingan. Poydevor plitasining bir qismiga 916 kub metr beton quyilgan.
Ayni paytda qurilish maydonida 450 nafar ishchi va mutaxassis hamda 100 dan ortiq maxsus texnika faoliyat yuritmoqda.
Dastlabki hisob-kitoblarga ko‘ra, loyihadagi mahalliy mahsulotlar ulushi 21 foiz yoki 1,9 milliard dollarni tashkil etadi. Prezident bu ko‘rsatkich yetarli emasligini bildirib, uni kamida 30 foizga yetkazish, qurilish-montaj ishlarining 65 foizini milliy korxonalar tomonidan bajarish va 7 ming nafar mahalliy ishchi hamda mutaxassisni jalb etish vazifasini qo‘ydi.
Shuningdek, Forish tumanida 200 gektarlik qurilish materiallari sanoat zonasi tashkil etish, unda kamida 100 ta qo‘shma korxonani joylashtirish va 15 ta yo‘nalishda mahsulot ishlab chiqarishni mahalliylashtirish taklif qilindi.
AESning tashqi infratuzilmasi doirasida 388 kilometr elektr tarmoqlari, 110 kilovoltli podstansiya, 21 kilometr ichimlik va 120 kilometr texnik suv quvurlari, 39,5 kilometr avtomobil hamda 11 kilometr temir yo‘l qurilishi rejalashtirilgan.
Prezident atom stansiyasi va atomchilar shaharchasini yuqori sifatda, xavfsiz hamda belgilangan muddatlarda qurish, mahalliy korxonalar ishtirokini kengaytirish va zarur kadrlarni tayyorlash bo‘yicha mutasaddilarga topshiriqlar berdi.
