Jazirama issiqda 11:00 dan 16:00 gacha ko‘chada ishlash taqiqlanadi
Davlat mehnat inspeksiyasi jazirama issiq sharoitida barcha ish beruvchilarni xodimlarning hayoti va sog‘ligini muhofaza qilish uchun kechiktirib bo‘lmaydigan choralarni ko‘rishga chaqirdi. Unga ko‘ra, kunning eng issiq vaqtida, ya’ni soat 11:00 dan 16:00 gacha ochiq havodagi ishlarni hamda og‘ir jismoniy mehnatni cheklash yoki butunlay to‘xtatish lozim.
Ish beruvchilar xodimlarni toza va salqin ichimlik suvi, qulay hamda soyali dam olish joylari, shuningdek, yengil, havo o‘tkazuvchi maxsus kiyimlar bilan yetarli darajada ta’minlashlari shart.
Bundan tashqari, tibbiy ko‘rikdan o‘tmagan xodimlarni ishga qo‘ymaslik, barcha ishchilarga issiq urishi va suvsizlanishning oldini olish hamda birinchi yordam ko‘rsatish tartibini o‘rgatish talab etiladi. Ish jarayonida sog‘ligi yomonlashgan xodimlarga zudlik bilan birinchi tibbiy yordam ko‘rsatilishi shart.
Avvalroq Qashqadaryo va Surxondaryoda anomal issiq sabab og‘ir yuk mashinalari harakati cheklangan edi. Bir qator hududlarda bog‘chalar faoliyati vaqtincha to‘xtatilmoqda.
