Janubiy Koreyada 19 nafar o‘zbekistonlik xalqaro qidiruvga berildi
Milliy politsiya agentligi ma’lumotlariga tayanib “The Korea Times” nashrining xabar berishicha, qidiruvdagi xorijliklar ro‘yxatida Xitoy fuqarolari (40 kishi) yetakchilik qilmoqda. Keyingi o‘rinlarda O‘zbekiston (19 nafar), Mo‘g‘uliston (17 nafar) hamda Vyetnam (13 nafar) fuqarolari qayd etilgan. Qidiruvdagi shaxslarning 47 nafari firibgarlikda, qolganlari esa odam o‘g‘irlash, fohishalik, giyohvand moddalar savdosi va og‘ir tan jarohati yetkazish kabi jinoyatlarda ayblanmoqda.
O‘zbekistonliklarning aynan qaysi qilmishlar bo‘yicha qidirilayotgani hozircha ochiqlanmagan.
Shu bilan birga, mamlakatda xorijliklar bilan bog‘liq boshqa og‘ir jinoyatlar ham fosh etilmoqda. Xususan, sentyabr oyida Suriyadagi terrorchi guruhga moliyaviy va moddiy yordam ko‘rsatishda gumonlangan to‘rt nafar o‘zbekistonlik qo‘lga olindi. Tergov ma’lumotlariga ko‘ra, 30 yoshlardagi asosiy gumondor BMT tomonidan terrorchilik tashkiloti deb topilgan “Tavhid va jihod katibasi” guruhiga kriptovalyuta ko‘rinishida mablag‘ yuborib kelgan.
Gumonlanuvchi ushbu moliyaviy operatsiyalar orqali Janubiy Koreyada umumiy qiymati 170 million vonlik 11 ta transport vositasi va 2 ta ekskavator xarid qilib, ularni Suriyaga jo‘natgani aniqlangan. Huquqni muhofaza qiluvchi organlar vakillarining ta’kidlashicha, ushbu shaxs guruh tarkibidagi ukasi bilan aloqaga chiqqach, tashkilotni faol qo‘llab-quvvatlashni boshlagan.
