Iyul oyida deflyatsiya qayd etildi: qaysi mahsulotlar arzonladi, nimalar qimmatlashdi?
2026 yil iyul oyida yillik iste’mol narxlari indeksi 106,4 foizni tashkil etdi. O‘tgan yilning shu oyida bu ko‘rsatkich 108,9 foiz bo‘lgan edi. Natijada yillik inflyatsiya darajasi bir yil ichida 2,5 foizga pasaydi. Bu haqda Milliy statistika qo‘mitasi xabar berdi.
Mazkur davrda oziq-ovqat mahsulotlari narxlari o‘rtacha 0,91 foizga pasaydi. Shu bilan birga, nooziq-ovqat tovarlari 0,3 foizga, aholiga ko‘rsatiladigan pullik xizmatlar esa 0,5 foizga qimmatlashdi.
Asosiy oziq-ovqat mahsulotlari orasida sabzi narxi 12,6 foizga, uzun donli guruch 6,4 foizga, yumaloq donli guruch 6,1 foizga, mosh 4,2 foizga va piyoz 1,7 foizga oshib, inflyatsiyaga ta’sir ko‘rsatdi.
Shu bilan birga, baqlajon narxi 42,8 foizga, bulg‘or qalampiri 39,4 foizga, pomidor 24 foizga, tarvuz 20,3 foizga, kartoshka 18 foizga, qovun 14,5 foizga, shaftoli va bodring 10,6 foizga, sarimsoq 10 foizga, nok 7,1 foizga, uzum, olma va banan 6,6 foizga, tuxum esa 5 foizga arzonladi.
Nooziq-ovqat mahsulotlari orasida AI-98 va AI-100 markali benzin narxi 10 foizga, AI-95 markali benzin 8,5 foizga, AI-92 markali benzin esa 3,9 foizga qimmatlashdi.
Pullik xizmatlar segmentida maishiy chiqindi uchun to‘lov 2,7 foizga, mobil aloqa xizmatlari 2,4 foizga, shahar avtobusida yo‘l haqi esa 1,4 foizga oshgani qayd etildi.
Hisob-kitoblar 10 mingdan ortiq savdo va xizmat ko‘rsatish nuqtalarida qayd etilgan 2 milliondan ziyod narx kuzatuvlari asosida amalga oshirilgan. Monitoring davomida 419 turdagi oziq-ovqat va nooziq-ovqat mahsulotlari hamda 98 turdagi xizmatlar narxlari tahlil qilingan.
