Ispaniyada bir asrdan ortiq vaqtdan so‘ng ilk bor to‘liq Quyosh tutilishi kuzatiladi
12-avgust kuni Oy Quyoshni to‘liq to‘sib, Ispaniya osmonida quyosh botishi arafasida qisqa muddat qorong‘ilik yuzaga keladi. Oy soyasi Yer yuzasi bo‘ylab qariyb 8 260 kilometr masofani taxminan 1,5 soat ichida bosib o‘tadi. To‘liq tutilishning eng uzoq davom etadigan nuqtasi Islandiyaning g‘arbiy qirg‘oqlari yaqinida bo‘lib, u yerda hodisa 2 daqiqa 18 soniya davom etadi.
To‘liq tutilish faqat tor hududlarda kuzatilsa-da, qisman Quyosh tutilishini yuz millionlab odamlar tomosha qilishi mumkin bo‘ladi. Hodisa Kanada, AQSHning shimoliy qismi, Yevropaning katta qismi, G‘arbiy Afrika, Alyaska va Sibirning ayrim hududlaridan ham qisman ko‘rinadi.
Astronomlar deydiki, 12-avgust kuni Quyosh tutilishidan tashqari yana ikki noyob osmon hodisasi sodir bo‘ladi. Tong oldidan oltita sayyora osmonda bir qator bo‘lib ko‘rinadi, kechasi esa Perseid meteor oqimi eng yuqori faollik darajasiga chiqadi. Yangi oy fazasi tufayli meteorlarni kuzatish uchun qulay sharoit yuzaga keladi.
Yevropa kosmik agentligi (ESA), NASA va boshqa ilmiy tashkilotlar hodisani jonli efirda namoyish etishni rejalashtirgan. AQSH universitetlari olimlari esa Ispaniya va Islandiyadan 60 dan ortiq stratosfera zondlarini uchirib, Quyosh tutilishi vaqtida atmosfera harorati va boshqa fizik o‘zgarishlarni o‘rganadi.
Astronomlar Quyosh tutilishini kuzatishda oddiy quyosh ko‘zoynaklaridan foydalanmaslikni tavsiya qilmoqda. Hatto qisman tutilish vaqtida ham Quyoshga faqat maxsus himoya ko‘zoynaklari orqali qarash kerak. Aks holda ko‘z to‘r pardasi jiddiy shikastlanishi mumkin.
