Хитой ноябр ойида Россиядан рекорд даражада олтин сотиб олди
Нашр манбаларига кўра, ўтган ойда Россия Федерацияси Хитой Халқ Республикасига умумий қиймати 818,6 миллион еврога тенг бўлган олтин қуймаларини етказиб берган. Октябр ойида бу кўрсаткич 792,2 миллион еврони ташкил этган эди.
"Умуман олганда, 2025 йилнинг 11 ойи давомида Хитой Россиядан 1,6 миллиард евролик олтин сотиб олган. Таққослаш учун: ўтган йилнинг октябр-ноябр ойларида Россиядан Хитойга умуман олтин етказиб берилмаган, 2024 йилдаги ойлик максимал кўрсаткич эса бор-йўғи 189,9 миллион еврони ташкил этган эди", дея қайд этади Financial Times.
Bloomberg'нинг маълум қилишича, 2025 йилнинг биринчи ярми давомида Россия қимматбаҳо металларининг Хитойга экспорти деярли икки баравар кўпайиб, 1 миллиард долларга етган. Агентлик олтин етказиб бериш ҳажми ортишининг асосий сабаблари сифатида олтин нархининг рекорд даражага кўтарилгани ва талабнинг юқорилигини кўрсатмоқда.
Шу билан бирга, Financial Times газетасининг ёзишича, 2025 йилда Хитой томонидан олтин сотиб олишнинг ҳақиқий ҳажми расмий маълумотлардан 10 баравардан кўпроқ бўлиши мумкин.
Таҳлилчилар мамлакатнинг олтинга бўлган бундай юқори қизиқишини Пекин захираларини долларда сақлашдан воз кечаётгани билан изоҳламоқда.
