Hindiston shaxmat terma jamoasi Samarqanddagi Olimpiadada mehmonxona xonalari taqsimotidan norozi bo‘lishdi
Samarqandda bo‘lib o‘tayotgan 46-Shaxmat Olimpiadasi boshlanishidan avval musobaqaning favoritlaridan biri hisoblangan Hindiston terma jamoasi bilan bog‘liq ayrim noroziliklarning ularning ijtimoiy tarmoqlarida paydo bo‘la boshladi. Xususan, shaxmat olamida yuqori nufuzga ega “Chessbase India” you tube kanali ma’muri ham keyinchalik ushbu holatlar bo‘yicha Shaxmat federatsiyamiz raisi o‘rinbosari Alisher Sa’dullayevga savol bilan yuzlandi.
Internetda e’lon qilingan xabarlarga ko‘ra, Hindiston terma jamoasi Samarqand aeroportiga soat 09:30 da yetib kelgan. Jamoa bir soat ichida mehmonxonaga borgan.
Jamoaga Silk Road by Minyoun mehmonxonasidan 16 ta xona ajratilishi kerak bo‘lgan. Ammo delegatsiya mehmonxonaga kelganida xonalar band ekani va mahalliy tashkiliy qo‘mita bron ma’lumotlarini mehmonxonaga yubormagani ma’lum bo‘lgan. Jamoaga dastlab soat 12:30 da bitta xona, yarim soatdan keyin esa yana bitta xona berilgan. Shaxmatchilar shu xonalarda tayyorgarlik ko‘rgan, murabbiylar esa qolgan xonalar ajratilishini kutgan.
Kechga qadar 14 ta xona berilgan. Biroq jamoa a’zolarining ayrimlari o‘zlari avvaldan so‘ragan xonalarga joylashtirilmagan.
Hindiston terma jamoasi sardori, grossmeyster Srinath Narayanan X’dagi sahifasida jamoa Samarqand aeroportiga kelganidan 5 soat o‘tib ham mehmonxona xonalari ajratilmaganini yozgan.
“FIDE Chess 2026 Olimpiadasida dahshatli tajribaga duch kelyapmiz. Jamoa Samarqand aeroportiga 5 soat oldin yetib kelgan. Hali ham xonalar ajratilmadi va qachon berilishi haqida umuman aniqlik yo‘q”, – deb yozgan u.
Hindistonning yana bir taniqli grossmeysteri Vidit Gujrathi ham ushbu postni ulashib, Samarqanddagi Olimpiada haqidagi dastlabki taassurotlari “juda yomon” ekanini bildirdi.
“Samarqand, O‘zbekiston, Olimpiada-2026 haqidagi dastlabki taassurotlar juda yomon. Hali ham kutyapmiz”, – deb yozgan Gujrathi.
Vaziyatni joyida hal qilish uchun Hindiston Shaxmat federatsiyasi delegatsiya rahbari, grossmeyster Abhijit Kunte’ni Samarqandga yuborgan. Federatsiya prezidenti Nitin Narang esa mahalliy tashkiliy qo‘mita va FIDE bilan telefon orqali muvofiqlashtirish ishlarini olib borishiga to‘g‘ri kelgan bo‘lishi mumkin.
O‘zbekiston shaxmat Federatsiyasi rasmiy sahifalarida bu haqda rasmiy munosabat yoki tushuntirish bildirgani yo‘q. Faqatgina ochilish marosimi oldidan o‘tkazilgan matbuot anjumanida O‘zbekiston Shaxmat Federatsiyasi raisi o‘rinbosari Alisher Sa‘dullayevga Chessbase India ma’muri holat yuzasidan yuzlangach javob olindi.
Alisher Sa’dullayev:
“Avvalo, Shaxmat Olimpiadasi barcha davlatlarni birlashtiradigan juda katta tadbir hisoblanadi. Shu sababli, birinchi navbatda, shaxmatchilar o‘zlarini qulay his qilishi uchun keng va shinam makon yaratishni maqsad qilganmiz. Zal oldindan FIDE jamoasi bilan rejalashtirilgan va dizayn ham ular bilan hamkorlikda ishlab chiqilgan.
Muammolarga kelsak, siz tilga olgan Hindiston jamoasi bilan yaqinda suhbatlashdim. Reglamentga ko‘ra, ro‘yxatdan o‘tish va joylashish muayyan vaqtda amalga oshirilishi kerak edi. FIDE jamoasi va muvofiqlashtirish guruhi bu borada barcha zarur ishlarni tashkil qilmoqda. Hozir vaziyat bosqichma-bosqich tartibga keltirilmoqda va bu masala hal qilinishiga ishonaman.
Ertadan boshlab barcha muammolar bartaraf etilib, shaxmatchilar bemalol kelib, o‘z uchrashuvlarini boshlashlari uchun zarur sharoit yaratiladi, deb o‘ylayman”.
Qayd etish kerakki, 46-Butunjahon shaxmat olimpiadasi Samarqandda 16-sentyabrdan rasman start oldi. Hindiston terma jamoasining uchta a’zosi g‘alabani rasmiylashtirdi, birinchi taxta o‘yinchisi Arjun Erigaisi esa tailandlik raqibiga imkoniyatni boy berdi, qolgan jamoadoshlari esa g‘alabani rasmiylashtirdi.
