Gruziya markazida Alisher Navoiy haykali tantanali ravishda ochildi
Prezident matbuot xizmatining xabar berishicha, marosimda Alisher Navoiy nafaqat o‘zbek xalqining, balki jahon adabiyotining buyuk namoyandasi ekani, uning boy ijodiy merosi asrlar davomida butun insoniyatni ma’rifat, tafakkur va o‘zaro hurmatga chorlab kelayotgani alohida ta’kidlandi.
Ikki xalq do‘stligi uzoq tarixga ega. Toshkentning markaziy ko‘chalaridan biriga buyuk gruzin shoiri Shota Rustaveli nomi berilgan va unga poytaxtimizda haykal o‘rnatilgan edi. Endilikda ushbu an’ananing uzviy davomi sifatida Tbilisi markaziy bog‘laridan biriga Alisher Navoiy nomi berildi va uning salobatli haykali qad rostladi.
So‘nggi yillarda Tbilisida O‘zbekiston madaniyati va kinosi kunlari, Toshkentda esa Gruziya madaniyati kunlari muvaffaqiyatli o‘tkazilgani ham hamkorlik yangi bosqichga chiqqanidan dalolatdir.
Tbilisi jahon xaritasida Alisher Navoiy siymosiga ehtirom ko‘rsatgan navbatdagi poytaxtga aylandi. Hozirga qadar ulug‘ mutafakkir haykallari Moskva, Dushanbe, Ostona, Tokio, Minsk, Shanxay, Seul, Boku, Anqara va O‘sh kabi dunyoning yirik shaharlarida ham o‘rnatilgan.
