Germaniyadan Toshkentga pochta orqali 4 kg giyohvand modda yuborildi
Toshkentda Germaniyadan pochta orqali yuborilgan jo‘natma ichidan 4 kilogramm giyohvandlik moddasi aniqlandi. Uni qabul qilib olgan Chernogoriya fuqarosi ushlandi. Bu haqda Davlat xavfsizlik xizmati ma’lum qildi.
DXX va Bojxona qo‘mitasi xodimlari hamkorligida o‘tkazilgan tezkor tadbirda Yakkasaroy tumanida vaqtincha yashayotgan 2001-yilda tug‘ilgan Chernogoriya fuqarosi pochta bo‘limida Germaniyadan kelgan jo‘natmani olayotgan vaqtida to‘xtatilgan.
Jo‘natma tekshirilganda sport anjomlari ichiga yashirilgan 3 kg “Klefedron” hamda 1 kg “gashish” giyohvandlik vositalari aniqlanib, ashyoviy dalil sifatida rasmiylashtirib olingan.
Tezkor tadbir davomida xorijiy fuqaroning vaqtincha yashab turgan xonadoni ham ko‘zdan kechirilgan. U yerdan jami 30 gramm “Alfa-PVP” moddasi solingan 11 ta tayyor “zakladka”, shuningdek, zip-paketlar, elektron tarozi va boshqa buyumlar topilgan.
Hozirda Chernogoriya fuqarosiga nisbatan jinoyat ishi qo‘zg‘atilib, tergov harakatlari olib borilmoqda.
