Germaniyada Ilhom Aliyev haqoratli hayqiriqlar bilan kutib olindi
Kecha, 21-iyul kuni Ozarbayjon Prezidenti Ilhom Aliyev va Germaniya kansleri o‘rtasidagi uchrashuv boshlanishi arafasida Germaniyadagi bir guruh ozarbayjonliklar norozilik namoyishini o‘tkazdi. Aktsiya qatnashchilari Ozarbayjon davlat rahbari sha’niga tanqidiy va keskin hayqiriqlarni bildirishgan.
Namoyishchilar “siyosiy mahbuslarga ozodlik”, "Ilhom Aliyev – diktator” hamda “Ilhom – qo‘rqoq” degan shiorlarni ilgari surgan.
Ta'kidlash joizki, joriy yilning 13-15-fevral kunlari Myunxen xavfsizlik konferensiyasi davomida ham Ilhom Aliyev va ozarbayjonlik mustaqil jurnalist Emin Huseynov o‘rtasida og‘zaki ziddiyat yuzaga kelgan edi. O‘shanda Ozarbayjon Prezidenti matbuot erkinligi haqidagi savolga javoban “dunyoda mustaqil ommaviy axborot vositalari yo‘q” deya ta’kidlagan.
Avvalroq, 2023-yilda Markaziy Osiyo davlatlari yetakchilari qatorida Germaniya kansleri bilan “5+1” formatidagi uchrashuvlarda qatnashish uchun Berlinga borgan Tojikiston Prezidenti Imomali Rahmon o‘tirgan avtomobilga tojik muhojirlari tuxum uloqtirgan edi.
