Germaniyada anomal issiq sababli 5 mingdan ortiq kishi halok bo‘ldi
Germaniyada iyun oyining oxiriga kelib anomal issiq havo oqibatida taxminan 5 120 kishi hayotdan ko‘z yumdi. Deutsche Welle xabariga ko‘ra, eng og‘ir vaziyat 22-iyundan 28-iyungacha bo‘lgan birgina haftada kuzatilib, o‘sha kunlari 4 310 kishi vafot etgan.
Taqqoslash uchun, 2025-yil davomida yuqori harorat tufayli 2 600 ga yaqin kishi halok bo‘lgan edi.
Jazirama bilan bog‘liq o‘lim holatlarining 80 foizdan ortig‘i 75 yoshdan oshgan qariyalarga to‘g‘ri kelmoqda. Vafot etganlar orasida ayollar erkaklarga qaraganda ko‘proq. Bu katta yoshli aholi qatlamida ayollarning ulushi ko‘pligi bilan izohlanadi. Shifokorlarning qayd etishicha, o‘limga ko‘pincha quyosh urishi emas, balki jazirama oqibatida organizmdagi surunkali kasalliklarning og‘irlashishi sabab bo‘ladi.
Myunxendagi Gelmgolts markazi tadqiqot guruhi rahbari Aleksandra Shnayderning bildirishicha, Yevropada hozircha sovuq urishi oqibatidagi o‘limlar issiqdan vafot etish holatlariga qaraganda ko‘proq. Biroq iqlim o‘zgarishi sababli vaziyat tez o‘zgarmoqda.
Avvalroq Fransiyada jazirama qurbonlari ortayotgani, Parij o‘likxonalari to‘lib ketgani xabar qilingan edi.
