Farg‘ona vodiysida millionlab aholi yuqori seysmik xavf zonasida yashaydi – JSST
JSST Qirg‘iziston va Tojikistonning deyarli butun hududi, shuningdek, Qozog‘iston, Turkmaniston hamda O‘zbekistonning ayrim hududlari kuchli zilzila xavfi yuqori bo‘lgan zonalarda joylashganini ma'lum qildi.
Tashkilot mutaxassislar, ayniqsa, Farg‘ona vodiysini eng zaif hududlardan biri sifatida tilga olmoqda. Uch davlat — O‘zbekiston, Qirg‘iziston va Tojikiston hududlarini qamrab olgan vodiyda qariyb 11 million kishi istiqomat qiladi.
JSST ta’kidlashicha, 2023-yilda Turkiya va Suriyada yuz bergan vayronkor zilzilalar shifoxonalarning favqulodda vaziyatlarda uzluksiz ishlashi naqadar muhim ekanini yana bir bor ko‘rsatdi. Agar tibbiyot muassasalari falokatning ilk daqiqalaridayoq faoliyatini to‘xtatsa, minglab jabrlanganlar o‘z vaqtida tibbiy yordam ololmay qolishi mumkin.
Tashkilot ekspertlari tayyorgarlik ko‘rish ofat oqibatlarini bartaraf etishdan ancha arzon ekanini qayd etmoqda. BMT hisob-kitoblariga ko‘ra, yangi shifoxonalarni zilzilabardosh talablarga muvofiq qurish loyiha qiymatini 4 foizdan kamroq oshiradi. Mavjud binolarni mustahkamlash esa ularning qiymatining taxminan 1 foizi miqdorida xarajat talab qiladi, biroq bu zilziladan keyin ham shifoxonalarning ishlash imkoniyatini sezilarli darajada oshiradi.
Shuningdek, JSST favqulodda tibbiy brigadalarni doimiy shay holatda saqlash, muntazam o‘quv mashg‘ulotlari o‘tkazish, xalqaro hamkorlikni kuchaytirish hamda keksalar, nogironligi bo‘lgan shaxslar va majburiy ko‘chirilgan aholi kabi eng himoyaga muhtoj qatlamlarga alohida e’tibor qaratishni tavsiya etdi.
Tashkilot xulosasiga ko‘ra, so‘nggi yillardagi yirik zilzilalardan olinadigan eng muhim saboq — keyingi falokat sodir bo‘lishidan avval tayyorgarlikni kuchaytirish zarurligidir.
