Endi O'zbekistonda ishsizlar qolmaydimi? O'zbekistonda vakansiyalar va rezyumelar soni oshdi
2026-yilning dastlabki uch oyida O‘zbekistonda mehnat bozoridagi ijobiy tendensiyalar davom etmoqda. Markaziy bank tahliliga ko‘ra, ish beruvchilarning xodimlarga bo‘lgan ehtiyoji yuqori darajada saqlanib, bo‘sh ish o‘rinlari soni o‘tgan yilning shu davriga nisbatan 9,8 foizga ko‘paygan.
Hisobotda qayd etilishicha, mart oyi yakunida mamlakat bo‘yicha mavjud vakansiyalar soni 15,4 mingtaga yetgan. Ishchi kuchiga eng katta talab xizmat ko‘rsatish, chakana savdo, umumiy ovqatlanish hamda ishlab chiqarish tarmoqlarida kuzatilgan. Qurilish sohasida ham investitsiya loyihalari va mavsumiy omillar ta’sirida yangi ishchi kuchiga ehtiyoj ortgani ta’kidlangan.
Shu bilan birga, ish qidirayotgan fuqarolar soni ham sezilarli ravishda oshgan. HeadHunter Uzbekistan ma’lumotlariga ko‘ra, 2026-yilning birinchi choragida platformadagi faol rezyumelar soni 31,5 foizga ko‘payib, 636 ming nafarga yetgan.
Markaziy bank mutaxassislari bu holatni mehnat bozoridagi raqobatning kuchayishi bilan izohlashgan hamda ish izlovchilar sonining vakansiyalarga nisbatan tezroq ortishi ish haqi o‘sish sur’atlarining asta-sekin barqarorlashishiga ham ta’sir ko‘rsatayotgani aytilgan.
Bandlikning asosiy o‘sishi xizmatlar sohasi hissasiga to‘g‘ri kelgan. Xususan, moliyaviy va sug‘urta xizmatlari, professional hamda texnik faoliyat, shuningdek, ma’muriy va yordamchi xizmatlar yo‘nalishlarida yangi ish o‘rinlari ko‘proq yaratilgan. Aksincha, qishloq xo‘jaligi tarmog‘ida bandlar soni qisqargan bo‘lsa, sanoat va savdo sohalarida o‘sish sur’ati saqlanib qolgan.
Tahlil natijalariga ko‘ra, yangi ish o‘rinlarining katta qismi xususiy sektor hissasiga to‘g‘ri kelmoqda. Jumladan, 2025-yilda xususiy korxonalarda bandlik 5,2 foizga oshgan va umumiy bandlik o‘sishining asosiy qismini ta’minlagan. Davlat sektorida esa ushbu ko‘rsatkich 2,6 foizni tashkil etgan.
Shuningdek, 2025-yilning to‘rtinchi choragi yakunlariga ko‘ra, mamlakatdagi ishsizlik darajasi 4,8 foiz etib qayd qilingan. Joriy yilning birinchi choragida o‘rtacha nominal ish haqi 17,4 foizga, inflyatsiya hisobga olingan real ish haqi esa 9,5 foizga oshgan. Eng yuqori ish haqi o‘sishi moliyaviy va sug‘urta xizmatlari, transport hamda boshqa xizmat ko‘rsatish yo‘nalishlarida kuzatilgan.
