Endi bolaga otasining ismini familiya sifatida berish mumkin bo‘ladi
O‘zbekistonda bolaga otasining ismini familiya sifatida berish mumkin bo‘ladi. Bu haqda Oila kodeksining 69-moddasiga kiritilayotgan o‘zgartirishda so‘z boradi.
Senatning 8-avgust kuni bo‘lib o‘tgan 18-yalpi majlisida “O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi Qonun muhokama qilindi.
Mazkur qonun bilan Oila kodeksining 69-moddasiga o‘zgartirish kiritilmoqda. Unga ko‘ra, bolaga otasining ismini familiya sifatida berish imkoniyati qonunchilikda mustahkamlanmoqda.
Amaldagi tartibga ko‘ra, bolaning familiyasi ota-onasining familiyasiga qarab belgilanadi. Shu bilan birga, ota yoki ona milliy an’analarga ko‘ra boboning ismini ham familiya sifatida berishi mumkin.
Yangi o‘zgartirish orqali otaning ismini bolaga familiya sifatida berish masalasi ham qonunchilikda aniq belgilab qo‘yiladi. Senatorlarning ta’kidlashicha, bu fuqarolarga qo‘shimcha qulaylik yaratib, milliy va diniy an’analarga muvofiq o‘z xohish-istaklarini amalga oshirish imkonini beradi.
Muhokama so’ngida qonun senatorlar tomonidan ma’qullandi.
