Eksportda bojxona va sertifikat to‘lovlari 30 foizga arzonlashadi. Biznes uchun bir qator cheklovlar bekor qilindi
Yangi tartibga muvofiq, 1-sentyabrdan e’tiboran shartnomasiz, invoys asosida import qilishda xorijiy hamkorga oldindan pul o‘tkazish bo‘yicha amalda bo‘lgan cheklovlar olib tashlandi. Shuningdek, invoys orqali eksport qilishda 50 foizlik oldindan to‘lovni ta’minlash hamda tovarlarni milliy valyutada eksport qilishda bank kafolati, akkreditiv yoki sug‘urta polisini taqdim etish majburiyati bekor qilindi. Bunga qo‘shimcha ravishda, import jarayonida oziq-ovqat, kosmetika, dori-darmon va kimyoviy moddalarga oid bir qator ortiqcha ruxsatnoma va guvohnomalarni talab qilish amaliyotiga chek qo‘yildi.
Tadbirkorlarni qo‘llab-quvvatlashning navbatdagi bosqichi 1-oktyabrdan kuchga kiradi. Unga ko‘ra, mahsulotlar eksportida bojxona rasmiylashtiruvi, fitosanitariya, fumigatsiya hamda tovarning kelib chiqish sertifikatlari uchun undiriladigan yig‘im va to‘lovlar miqdori 30 foizga qisqartiriladi. Shu bilan birga, soliq xavfi past hamda QQS guvohnomasi faol bo‘lgan eksportchi va importchilar uchun import QQS summalarini o‘zaro hisobga olish imkoniyati yaratiladi.
Islohotlarning mantiqiy davomi sifatida 2027-yildan bojxona qiymatini nazorat qilish tizimi tubdan soddalashtiriladi. Xususan, insofli tadbirkorlar olib kirgan tovarlarning bojxona qiymati ular erkin muomalaga chiqarib bo‘linganidan so‘ng tekshiriladi va davlat organlari tomonidan qat’iy bojxona qiymatini belgilab qo‘yish taqiqlanadi. Narxlarni baholashda esa rasmiy diler hamda distribyutorlarning ma’lumotlariga tayaniladi. 2027-yil iyunidan esa jismoniy shaxslar uchun ham ayrim kichik bojxona yig‘imlarini undirish to‘xtatiladi.
