Ekologiya bo‘limi boshlig‘i 11 million so‘mlik kompyuter jamlanmasini pora sifatida olayotganda qo‘lga tushdi
Samarqand viloyati Ekologiya va iqlim o‘zgarishi boshqarmasi 9-iyul kuni ijtimoiy tarmoqlarda tarqalgan, boshqarma boshlig‘i A. Qurbonov hamda Jomboy tumani Ekologiya bo‘limi boshlig‘i J. Raxmatovni daraxtlarning noqonuniy kesilishiga aloqador etib ko‘rsatgan xabar yuzasidan raddiya bergan edi.
Raddiyada ma’lum qilindiki, ijtimoiy tarmoqlarda tarqalgan surat aslida 2026-yil 14-aprel kuni viloyat Ekologiya va iqlim o‘zgarishi boshqarmasi boshlig‘i A. Qurbonovning Zarafshon milliy tabiat bog‘i faoliyatini o‘rganish jarayonida olingan bo‘lib, undagi holat daraxt kesilishi bilan bog‘liq emas.
Oradan bir necha soat o‘tib, Bosh prokuratura huzuridagi Iqtisodiy jinoyatlarga qarsi kurashish departamenti Jomboy tumani ekologiya va atrof-muhitni muhofaza qilish bo‘limi boshlig‘i J. Raxmatov pora olayotganda ushlanganini ma'lum qildi.
Rasmiy axborotda qayd etildiki, tezkor tadbir davomida mansabdor shaxs “Zarafshon” mahallasi hududida 150 tup terak daraxti kesilgani yuzasidan to‘plangan hujjatlar bo‘yicha chora ko‘rmaslik, tabiatga yetkazilgan zararni kamaytirish hamda transport vositasini jarima maydonchasidan chiqarib berish evaziga fuqarodan 11 million so‘mlik kompyuter jamlanmasini olgan vaqtida ashyoviy dalillar bilan ushlangan.
.jpg&w=3840&q=75)
Mazkur holat yuzasidan Jinoyat kodeksining 210-moddasi bilan (pora olish) jinoyat ishi qo‘zg‘atilgan. Hozirda tergov harakatlari olib borilmoqda.
E'tiborlisi, Ekologiya boshqarmasi raddiyasida ijtimoiy tarmoqlarda tarqalgan surat va unda ilgari surilgan ayblovlar rad etilgan bo‘lsa, oradan bir kun o‘tib e'lon qilingan rasmiy axborotda Jomboy tumani ekologiya bo‘limi boshlig‘i aynan 150 tup daraxt kesilgani holati bo‘yicha to‘plangan hujjatlar yuzasidan pora olishda gumon qilinib ushlangani ma'lum qilindi. Ayni paytda tergov davom etmoqda.
