Dubayda ayollarga “uy bekasi” deb murojaat qilishdan voz kechilmoqda, endi ularga nisbatan"Avlodlar bunyodkori" degan maqom qo‘llaniladi
BAAda ayollarga hurmat yuzasidan "uy bekasi" atamasidan voz kechildi. Dubay hukumati ayollarning oiladagi o‘rni va mehnatini yanada yuksak qadrlash maqsadida muhim qaror qabul qildi. Endilikda rasmiy hujjatlarda "uy bekasi" (Housewife) atamasi o‘rniga "Avlodlar bunyodkori" (Generations Shaper) iborasi qo‘llaniladi.
Mazkur tashabbus Dubay valiahd shahzodasi Shayx Hamdan bin Muhammad Ol Maktum tomonidan Onalar kuni munosabati bilan e'lon qilingan. Uning ta'kidlashicha, "uy bekasi" atamasi ayolning faqat uyda ekanini ifodalasa, "Avlodlar bunyodkori" esa uning asl vazifasi, kelajak avlodni tarbiyalash, qadriyatlarni shakllantirish va jamiyat poydevorini yaratishdagi ulkan xizmatini aks ettiradi. Davlat va moliyaviy tashkilotlar yangi maqom egalariga mos maxsus oilaviy va jamg‘arma dasturlarini joriy etmoqda. Kelgusida ayrim ijtimoiy qo‘llab-quvvatlash dasturlari ham aynan ushbu maqom asosida taqdim etilishi rejalashtirilgan.
