Dubay xalqaro aeroportiga o‘zbekistonliklar ishga taklif etilmoqda
O‘zbekiston fuqarolari BAAning Dubay xalqaro aeroportidagi biznes va birinchi toifa yo‘lovchilari uchun mo‘ljallangan maxsus kutish zallarida ishlashga taklif etildi. Bu haqda Migratsiya agentligi ma’lum qildi.
Ma’lum qilindiki, xizmat ko‘rsatish yo‘nalishi bo‘yicha 80 ta bo‘sh ish o‘rni mavjud. Nomzodlar 20–30 yosh oralig‘ida bo‘lishi, mehmonxona va restoran xizmati yo‘nalishida mutaxassislikka, ovqat va ichimliklar servisi bo‘yicha kamida bir yillik ish tajribasiga ega bo‘lishi hamda ingliz tilini kamida B2 darajada bilishi talab etiladi. Xalqaro til sertifikatiga ega nomzodlarga ustunlik beriladi.
Ish kuniga 8 soat davom etadi, mehnat shartnomasi 2 yil muddatga tuziladi. Oylik ish haqi 8 226 AED (2 250 AQSH dollari)ni tashkil etadi.
Ish beruvchi ishchi vizasi, aviachipta, aeroportdan transfer, ish ruxsatnomasi, tibbiy sug‘urta, turar joy, ovqatlanish hamda ish joyiga transport xarajatlarini o‘z zimmasiga oladi. Shuningdek, daromad solig‘i ushlab qolinmaydi.
Arizalar 13-avgustga qadar qabul qilinadi. Hujjatlar 3–7 kun ichida ko‘rib chiqiladi, saralashdan o‘tgan nomzodlar esa 20–25-avgust kunlari onlayn suhbatda ishtirok etadi.
