Davlat xaridlarida 12,6 trillion so‘mlik qonunbuzarlik aniqlandi. Korrupsiya davlatga qariyb 3 trillion so‘m zarar yetkazdi
Oliy Majlis Senatining 18-yalpi majlisida Korrupsiyaga qarshi kurashish agentligining yillik hisoboti ko‘rib chiqildi. Hujjatga ko‘ra, o‘tgan yili korrupsiya sabab 7 517 nafar shaxs jinoiy javobgarlikka tortilgan, davlat manfaatlariga yetkazilgan zarar esa 2,9 trillion so‘mdan oshgan.
Eng yuqori korrupsiyaviy xavf maktabgacha va maktab ta’limi, sog‘liqni saqlash vazirliklari, hokimliklar hamda tijorat banklarida ro‘yxatga olindi. Shuningdek, davlat xaridlari sohasida 12,6 trillion so‘mlik qonunbuzilishlar aniqlangan bo‘lsa, ishlab chiqilgan normativ-huquqiy hujjat loyihalarining har to‘rtinchisida korrupsiyaviy omillar topilgan.
Tahlillar asosida sog‘liqni saqlash, ta’lim, bank va kadastr sohalaridagi muammolarni bartaraf etish uchun manzilli “yo‘l xaritalari” tasdiqlandi. Senatorlar davlat xaridlarida qonuniylikni ta’minlash va yetkazilgan zararni undirish ustidan nazoratni kuchaytirish bo‘yicha tegishli qaror qabul qildi.
