Dam olish kunlari O‘zbekistonda havo 42 darajagacha isiydi
Bugun respublika bo‘yicha kunduzi havo harorati 34–37 darajani tashkil etadi. 8–9-avgust kunlari esa harorat 37–40 darajagacha, shimoliy, janubiy va cho‘l hududlarining ayrim joylarida 41–42 darajagacha ko‘tariladi. Bu haqda O‘zgidromet xabar berdi.
Hafta oxirida respublika bo‘yicha yog‘ingarchilik kutilmaydi. Faqat tog‘li hududlarning ayrim joylarida momaqaldiroq bilan qisqa muddatli yomg‘ir yog‘ishi mumkin. Toshkent viloyati hamda Farg‘ona vodiysi viloyatlarining tog‘ oldi va tog‘li hududlarida sel-suv toshqinlari yuzaga kelishi ehtimoli bor.
Shuningdek, 8–9-avgust kunlari respublikaning shimoliy va cho‘l hududlarida shamol tezligi sekundiga 13–18 metrgacha kuchayishi, ayrim joylarda chang-to‘zonlar kuzatilishi prognoz qilinmoqda.
Toshkent shahrida esa yog‘ingarchilik kutilmaydi. Bugun havo harorati 36 daraja atrofida bo‘lsa, dam olish kunlari 37–39 darajagacha ko‘tariladi. Kechasi 21–24 daraja iliq bo‘ladi.
