Budjet mablag‘larini taqsimlash tartibi o‘zgardi
Adliya vazirligi Budjet kodeksiga kiritilgan o‘zgartishlar asosidagi tegishli tartibni davlat ro‘yxatidan o‘tkazdi. Yangi qoidalarga ko‘ra, mahalliy vakillik organlarining budjetni rejalashtirish va daromadlar prognozini shakllantirishdagi vakolatlari kengaytirildi.
Islohot doirasida samarasiz xarajatlarning oldini olish mexanizmi joriy etildi. Unga ko‘ra, vakolatli organdan bildirishnoma olgan tashkilotlar yangilangan budjet so‘rovini uch ish kuni ichida taqdim etishi shart. Shuningdek, mahalliy budjetlarga ssuda ajratish bo‘yicha arizalarni ko‘rib chiqish muddatlari ham qisqartirildi.
Bundan buyon budjet mablag‘larini taqsimlovchilarning rivojlantirish dasturlari kamida uch yilga mo‘ljallab tuziladi hamda ularda aniq ijtimoiy-iqtisodiy ko‘rsatkichlar aks etadi. Hujjat bilan, shuningdek, moliyaviy barqarorlikni baholovchi umumiy fiskal balansni shakllantirish tartibi joriy qilindi.
