Bog‘cha xodimlarini “Open budget”ga va tozalashga majburlagan direktor 20 million so‘mdan ortiq jarimaga tortildi
Oliy Majlisning Inson huquqlari bo‘yicha vakili (ombudsman)ga fuqaro murojaat qilib, Sirdaryo viloyatidagi davlat maktabgacha ta’lim tashkilotida xodimlar noqonuniy ravishda majburiy mehnatga jalb etilayotganini ma’lum qilgan. Ushbu shikoyat asosida Ombudsman vakillari va Davlat mehnat inspeksiyasi hamkorlikda surishtiruv ishlarini olib bordi.
O‘rganishlar davomida bog‘cha rahbariyati xodimlarni muassasa hovlisida qurilishdan keyingi tozalash ishlariga hamda “Open budget” portalida tashabbuslarga majburiy ravishda ovoz yig‘ishga jalb etgani o‘z tasdig‘ini topdi. Mehnat inspeksiyasi bu holatni Mehnat kodeksining 5-moddasi talablarini qo‘pol ravishda buzish va majburiy mehnat sifati baholadi.
Tekshiruv natijalariga ko‘ra, bog‘cha rahbari G.A.ga nisbatan Ma’muriy javobgarlik to‘g‘risidagi kodeksning 51-moddasi 1-qismiga asosan bazaviy hisoblash miqdorining 50 baravari, ya’ni 20 million 600 ming so‘m miqdorida jarima jazosi tayinlandi. Eslatib o‘tamiz, amaldagi qonunchilikka ko‘ra, xodimlarni o‘z xizmat vazifasiga kirmaydigan ishlarga qanday shaklda bo‘lmasin majburiy jalb etish qat’iyan taqiqlanadi.
