Бино бузилиши тўхтатилди: тадбиркорнинг мулкий ҳуқуқи тикланди!
Навбатдаги қабулда «Т.С.» МЧЖ раҳбари мурожаат қилиб, жамиятга тегишли бўлган нотурар жой биноси жамоат эҳтиёжлари учун олиб қўйилгани, бироқ ҳокимлик томонидан белгиланган компенсация тўловлари вақтида тўлаб берилмаётганини маълум қилди.
Ўрганиш натижаларига кўра, Тошкент тумани ҳокимлиги ҳамда «Т.С.» МЧЖ ўртасида қонунчиликда белгиланган тартибда нотариал тасдиқланган келишув битими тузилгани, мулк қиймати лицензияга эга мустақил баҳоловчи ташкилот томонидан баҳоланиб, тегишли экспертиза хулосалари олингани маълум бўлди.
Шунга кўра ваколатли давлат органларига “Ер участкаларини компенсация эвазига жамоат эҳтиёжлари учун олиб қўйиш тартиб-таомиллари тўғрисида”ги Қонун талабларига қатъий риоя этиш бўйича кўрсатма хати юборилди.
Кўрилган тезкор чоралар натижасида компенсация миқдорини тасдиқлаш масаласи Халқ депутатлари Тошкент вилояти Кенгаши сессияси кун тартибига киритилди ва маблағ ажратилиши билан тадбиркор ҳисоб рақамига ўтказиладиган бўлди.
Энг муҳими, амалдаги қонунчиликка асосан, компенсация тўлови тўлиқ тўланмагунга қадар тадбиркорнинг биносини бузишга йўл қўйилмаслиги бўйича ҳокимият органларига алоҳида кўрсатма берилиб, мулкдорнинг ҳуқуқлари ҳимояга олинди.
