Belarusdan O‘zbekistonga ilk to‘g‘ridan to‘g‘ri “Slavyan karvoni” blok-poyezd yo‘lga chiqdi
Kecha, 30-iyul kuni Belarusning Orsha-Vostochnaya stansiyasidan Toshkent viloyatidagi Chuqursoy stansiyasiga yo‘l olgan “Slavyan karvoni” nomli ilk to‘g‘ridan to‘g‘ri blok-poyezdi yo'lga chiqdi. Bu haqda “O‘ztemiryo‘lkonteyner” xabar berdi.
71 shartli vagondan iborat yuk poyezdi tarkibida yog‘ochni qayta ishlash sanoati mahsulotlari, shakar, oziq-ovqat mahsulotlari, omixta yem va boshqa turdagi yuklar tashilmoqda. Dastlabki bosqichda ushbu blok-poyezd oyiga ikki marta qatnashi rejalashtirilgan.
“Yangi temiryo‘l qatnovining yo‘lga qo‘yilishi Belarus va O‘zbekiston o‘rtasidagi yuk tashish hajmini oshirish, transport-logistika aloqalarini rivojlantirish hamda savdo-iqtisodiy hamkorlikni yanada mustahkamlashga xizmat qiladi”, deyiladi xabarda.
Poyezd yo‘lovchi poyezdlari jadvali asosida harakatlanadi. Shu sababli uning qachon jo‘nashi va qachon manzilga yetib borishi oldindan aniq bo‘ladi. Tarkibga 20 tonnalik konteynerlar ham qo‘shilishi mumkin. Bu esa Belarusdagi kichik korxonalarga 60 tonnalik vagon to‘lishini kutmasdan, yuklarini kichik hajmda jo‘natish imkonini beradi.
Mutaxassisning aytishicha, 20 tonnalik konteynerni temiryo‘l orqali tashish avtomobil transportiga qaraganda kamida 1,5 baravar arzon. Avval alohida vagon bilan yuk yetkazish ikki oygacha davom etgan bo‘lsa, endi yangi blok-poyezd yukni O‘zbekistonga 5–7 kunda yetkazib beradi.
Qayd etilishicha, yangi temiryo‘l yo‘nalishi Belarus va O‘zbekiston o‘rtasidagi yuk tashish hajmini oshirish, transport-logistika aloqalarini rivojlantirish hamda savdo-iqtisodiy hamkorlikni mustahkamlashga xizmat qiladi.
Shuningdek, “O‘ztemiryo‘lkonteyner” AJ ushbu yo‘nalishda import va eksport yuklari uchun kompleks transport-logistika xizmatlari hamda xalqaro yuk tashuvlarida sifatli servisni taqdim etishini ma’lum qildi.
