Belarus tergov hibsxonasida tug‘ilgan o‘zbekistonlik chaqaloq vatanga qaytarildi
Oliy Majlisning Inson huquqlari bo‘yicha vakili (Ombudsman) matbuot xizmati xabariga ko‘ra, joriy yilning 15-may kuni O‘zbekiston delegatsiyasi Minsk shahridagi tergov hibsxonasida saqlanayotgan vatandoshlar bilan uchrashgan.
Suhbat davomida homilador ayol hibsxona sharoitida tug‘iladigan farzandini parvarishlash imkoniyati cheklanganini bildirib, uni O‘zbekistondagi yaqin qarindoshlariga topshirishda amaliy yordam so‘ragan.
Ushbu murojaat nazoratga olinib, bola dunyoga kelgach, tegishli davlat organlari, O‘zbekistonning Belarusdagi elchixonasi hamda MDH Inson huquqlari bo‘yicha komissiyasi hamkorligida zarur konsullik va huquqiy tartib-taomillar amalga oshirildi.
Natijada chaqaloq uchun barcha zarur hujjatlar rasmiylashtirilib, joriy yilning iyul oyida u eson-omon O‘zbekistonga olib kelindi va yaqinlariga topshirildi.
