Bektemirda 778 ta xonadon kadastrsiz qolgani bo‘yicha rasmiy munosabat bildirildi
Mavjud ma’lumotlarga ko‘ra, majmua qurilishi 2020-yilda shaharsozlik kengashi va davlat ekspertizasi xulosalarisiz hamda qurilish nazorati organlarida ro‘yxatdan o‘tkazilmasdan boshlangan. Amaldagi Bosh rejaga ko‘ra, ushbu hududda binolarning balandligi eng ko‘pi bilan 5 qavat bo‘lishi belgilangan bo‘lsa-da, amalda 10 va 16 qavatli uylar qad ko‘targan. Aynan dastlabki ruxsat beruvchi hujjatlarning rasmiylashtirilmagani bugungi kunda kadastrni odatiy tartibda rasmiylashtirishga to‘sqinlik qilmoqda. Jami 874 ta xonadondan iborat majmuadagi 778 ta xonadon allaqachon fuqarolarga sotib bo‘lingan.
Aholi 2022-yildan buyon ushbu uylarga ko‘chib kirgan va hozirda 250 ta xonadonda fuqarolar amalda istiqomat qilmoqda. Vaziyatni tartibga solish maqsadida 2025-yil sentyabr oyida Toshkent shahar hokimining tegishli qarori qabul qilinib, yer uchastkasi va zarur shaharsozlik hujjatlarini keyinchalik rasmiylashtirish mexanizmi belgilab berilgan.
Binolarning xavfsizlik talablariga mosligini aniqlash bo‘yicha o‘tkazilgan texnik tekshiruvlar natijasida 11 ta blokning 7 tasi bo‘yicha ijobiy xulosa berilgan. biroq qolgan 4 ta blokda bartaraf etilishi lozim bo‘lgan texnik kamchiliklar borligi aniqlangan. Hozirda Hukumat va respublika idoralari ko‘magida barcha shaharsozlik hujjatlarini muvofiqlashtirish va obyektlarni foydalanishga qabul qilib, aholi manfaatlarini qonuniy va xavfsiz tarzda hal etish choralari ko‘rilmoqda.
